مدد مدد سيدي الميدان " نادر الأسيوطي"

مولد سيدي الميدان " شعر نادر الأسيوطي"
مدد مدد سيدي الميدان
والكل واقف فيك جعان
حتي الشجر م الزحمه عان
حتي اليفط حتي الحيطان
جعان عداله جعان أمان
كله جعان كله جعان
*********
جعان أنام وأقول خلاص
جعان يا عالم نفسي ف خلاص
جعان جعان والكرش غاص
جعان كفايه أكل اللبان
مدد مدد سيدي الميدان
*********
عبد فقير بيقول علي الله
وعبد داير كوش ما خله
وعبد ينهب وعبد ولَّه
ما خلي حتي عصا الودان
مدد مدد سيدي الميدان
************
دُورِي يا دنيا ولِفْي دوري
ويله همي هاتي لي دوري
دا أنا نفسي أفرح أبين سروري
أصْلِي نسيت الفرح زمان
مدد مدد سيدي الميدان
**************
طال يا ناس طال الانتظار
طال يا خلق فين الانتصار
طال الجشع والظلم صار
حلال يُرتل بعد الأدان
مدد مدد سيدي الميدان
************
مدد وحأخده من كل شب
يعدل في جيلنا ما أصله شَاب
مدد لحيلنا هوه الصواب
مدد معاده وآن الأوان
مدد مدد سيدي الميدان
***********
ميدان ودان كل جبان
سامع وساكت شاهد عيان
مل وزهق من المهان
صمم وقرر يصدر بيان
مدد مدد سيدي الميدان
**********
مولد يا دنيا والخلق هان
ساقيه ولعبه بيد أُلعبان
حظك وبختك من غير ضمان
الحل جوه وسط الميدان
مدد مدد سيدي الميدان
شعر نادر الأسيو

طي