عايزين يخربوها .......

من طرف ashraf الجمعة فبراير 10, 2012 5:25 pm

عايزين يخربوها
************
اللي عايزين يخربوها
و يقعدوا علي تلها
و اللي زارعينها مشاكل
مسيرنا يوم و نحلها

و اللي فاكرينا غلابة
لقمة سهلة ف أكلها
طبعهم فاق الديابة
والتعالب
في الخباثة و مكرها

اللي لسه بينهبوها
و اللي عايزين يهدموها
و اللي ناويين ميسيبوها
و يحجروا علي ضلها

اللي عايزين يسرقوها
و اللي لسه بيحرقوها
و اللي فاكرين غرقوها
دول ما عرفوش سرها

اللي عايزين يخربوها
شّرقوها ..... و غرّبوها
أمريكوها ... و عرّبوها
نصرنوها .... و اسلموها
طب لمين هيسلموها
و لا مين هيقولها

يا اللي ياما بتجرّحوها
حاولوا مرة و فرحوها
اجمعوها ..... و اطرحوها
ياما دوقتوا حلوها

يا اللي جد بتعشقوها
ابنوا ليها ... و عمروها
و ازرعوها ... و خضروها
و احرسوها ... لا تسيبوها
و جوه نن العين شيلوها
م اللي عايزين يخربوها
و يقعدوا علي تلها

ياللي عايزين تخربوها
و تاكلوا ناسها و أهلها
كل حاجة مسيرها ترجع
بكره تاني لأصلها

أشرف البنا
البحر الأحمر