قصيدة .. ( هنعمـل إيـه ..؟ )

من طرف وليد العشرى السبت يناير 14, 2012 5:44 pm

هتفنا للنظام إسقط .. فسقّطنــــــاه
وقلنا للنظام إرحل .. وطلّعنــــــــاه
فرحنا قد ما فرحنا .. وقلنا الله
أمل فى قلوبنا عاش فينا .. وكمان عشناه
وقفنا كلّـنا واحد ..
... هتفنا كلّـنا واحد ..
عشان كان كلّـنا وااااااحد .. فحقّقـناه
** ** **
بدأنا نعيش فى حريه .. ونتكلّم
بدأنا نحس إن احنا بنتقدّم
نقول كل اللى فى قلوبنا ..
معدش الكذب يتصدّق .. معدش الصدق يتكذّب
معدشى حد يتّاخد فى أمن الدوله يتعذّب
معدش الرشوه والكوسه طريق المجد
معدشى حد يتعرّى فى عز البرد
معدشى حد هيزل ف كرامة حد
عرفنا .. بس متأخّر ..
جبال الظلم مهما تعلى ..
بادينا .. فى يوم تتهد
معدشى حد مش فاهم
ولا بيسكت على الظالم
وباسم طوارىء الحاكم ..
برىء ممكن فى يوم يتشد
عرفنا كلّنا فرعون بيتفرعن علينا ليه
عرفنا ان الفساد لعنه ..
إديه تخنق فى أرواحنا ..
فلمّـا بعنا أرواحنا .. قطعنا اديه
عرفنا ان الحقوق ماتجيش ..
بضعف النفس .. والتطنييييييش
عرفنا بجد إن الجيش .. حامينا ربنا يحميه
عرفنا ان الوطن غالى ..
ترابه فى السما عااااااالى
ولو نادانا .. طوّالى .. بأرواحنا نروح نفديه
عرفنا ان الشهيد كسبــــــــــان
نموت .. بس الوطن يتصان
ومهما كانت الأتمان .. فبرضه مش خساره فيه
لكن هوّه السؤال دلوقت ......... هنعمل ايه .....؟؟؟؟؟؟؟؟؟؟[/size]