شكل الحقيقة إتقلب

شكل الحقيقة إتقلب
واتلخبطت لخابيط
والقلب زاد قسوته
والعقل بقى عربيد
يعني اللي شايفه ذكي
بكره كإنه عبيط
ولمحت ياللعجب
منشور لصق ع الحيط
توب الكرامه إنخلع
ودَاروه بحبّة خيط
والاب باع أُسرته
والأبن هد البيت
شكل الحقيقة إتقلب
وإتلخبطت لخابيط
---------------
شَكل المِنَجد نسي
ف لحافنا كـام غُرّزه
قام اللحاف إنقطع
وإستنهز الفرصة
والكل قال غلطته
أصله لحاف قاسي
بيحب يفضل فوق
بين سلطة وكراسي
ضحك اللحاف ف الخَفى
ونط كام نطه
من كتر وخز الإبر
قاعد كما البطة
في ناس تقول ده عِمي
وناس تقول غلطه
وناس تقول إختشوا
دول لبسونا غبيط
شكل الحقيقة إنقلب
وإتلخبطت لخابيط
-----------------
يا شجرة الجميز
طول عمري بهواكِ
ضِلّك بنى لي بيت
بين أرضي وسماكِ
لو حتي فرعِك مال
جِزعك وتد ف الأرض
وإن ساءت الأحوال
حُبك علينا فرض
متصدقيش كدبهم
ده أنا خولي وجنايني
ده رسمي غير رسمهم
حتى انظري..... عايني
معذوره يا جنيتي
كترت فيران الغيط
شكل الحقيقة إتقلب
واتلخبطت لخابيط
-------------------
هقفل بيبان فرحتي
ومعاها ميت ترباس
وأستنى نور الأمل
وهشاهد التلفاز
وهصدق اللي أسمعه
مهما قالولي يا ناس
مشكلتك أنت وأنا
أنبوبة البوتجاز
ومذيعة من قلبها
بتقول بصوت مسموع
عالمِ كبير إكتشف
القط كان جربوع
والفرخة مال بختها
والديك بقى بيبيض
كل الحقايق هنا
إتلخبظت لخابيط
-------------------------------------
يا بلدنا صحي النوم
وداري على ضِلّك
بكره يجيلك يوم
وتشوفي مين ضَلّك
مين قومك م النوم
ومين زمان شَلّك
مين شغلته التنطيت
بيظبط التظابيط
ورسم لنا عالحيط
كرباك وواد عفريت
شكل الحقيقه إتقلب
وإتلخبطت لخابيط

--------------------------------------
علاء أبوذكري