.................

من طرف ashraf الأحد ديسمبر 25, 2011 10:43 pm

الكراسي
*******

اللي ماسكين ف الكراسي
و اللي صوتهم كان حماسي
و اللي عامل دبلوماسي
و اللي شكله رزين و راسي
و اللي في الأفراح يجامل
واللي في الأحزان يواسي
كله بيمصلح لنفسه
مش هاممهم غير كراسي

كراسي و اتفضل يا باشا
كرسي أحلي م البغاشة
يقلب الحزن لبشاشة
يسعدك يسعد سنينك
حتي لو تطلع معاشا

كرسي مخصوص للوجاهة
و كرسي معمول للنزاهة
و كرسي ياما كروش ملاها
و ياما ناس كات ع الحديدة
بالكراسي صبح .... معاها

هنا كراسي ... ماليها زي
قيمة و سيما
و نور و ضي
ده كرسي يغني
عن زاد و مي
يقول و يوعد...
و موت يا حي
و يالا هيّص
ده الكرسي جي

و كراسي بتحب اللمة
ياما كراسي كتير لامة
وكراسي VIP.. هامة
أدي كرسي بيعز التنطيط
و كرسي بيحب التخطيط
لمصانع أو مشاريع عامة

و كراسي ماشية مع الموجة
و غيرها مايلة و معووجة
و كتير معاها و محووجة
و كراسي لو وسط الهوجة
لها دور و لها شكل سياسي

و كراسي بتحب الزفة
و كرسي أصلي ايدين عفة
و الضهر مشدود ع الدفة
لا ينحني و ملفوف لفة
أصيل و بتميل له الكفة

وكراسي مش شايفها عيوبها
لا جوع و لا فقر شعوبها
تظلم و ما تحس قلوبها
عمالة تملا ف جيوبها
وتقول زمن غدار قاسي

و كراسي عايشة ف الماضي
بكلام و تهليل ع الفاضي
ده تزعله ... و ده بتراضي
و تقسمه مهم و عادي
ماهو أصل ده كرسي وراثي

و كراسي واخداها شطارة
تكدب ...... تنافق بمهارة
و لا ترضي أبدا بخسارة
متقولش غير هيا عبارة
ده خيركو من ساسي لراسي

أشرف البنا