من غير زعل

قبل الجلوس فوق الكراسي المدهبة
قبل النظام والحالة لسة مكركبة
قبل انتخاب عمدة وحبايب المصطبة
قبل دستور الرضا والطبطبة
ِِِ
قبل الشعارات والآهات وانا منكم
قبل الصوان وادي الحنان غرّقتكم
قبل الحيطان متلزّقوها بحسنكم
عاوز ضمان إني أعيش من فضلكم
ِِِ
عاوز أمان عاوز كمان متصدونيش
لو جه زمان وصرخت فيكو مهمنيش
لا شرطة تكتم صرختي ولا حتى جيش
ولا ينكسر قلمي وحبره مينتهيش
ِِِ
عاوز أعيش زي كل الخلق سيد
متحِوجش فـ كل دولة كالعبيد
عاوز أكيد .. إيدي متخشش حديد
لو عارضت وقلت حقي من جديد
ِِِ
والأكيد .. العيال عاوزين علام
مش حكاية وسد حاجتك والسلام
أو بداية وكمّل انت وشوف بكام
يكفى جهل وعنتظة بق وكلام
ِِِ
مش هنام ولا يهدا بالي فى أي يوم
لو لقيت الحق ضايع في الغيوم
والضلال في البحر غاطس أو يعوم
والكلام مدهون عسل نصه سموم
ِِِ
عاوز الاقي شغلة آكل منها عيش
وابقا زيّك لو سريرك كله ريش
يعني اعيش .. واوعى مرة تقول مفيش
ولّا هيّ حياتي عندك متساويش
ِِِ
صحتي وصحة عيالي دول سوا
أغلى م الكون دا بحاله وما حوى
انسى أعمال البدع والفهلوة
وفّر أطبا .. ممرضين .. وفّر دوا
ِِِ
الخلاصة خللي بالك يا فلان
يللي رح تدخل رياسة وبرلمان
كان زمان .. مش هطاطي واكون جبان
رغبتي عرفت طريقها للميدان
غضبتي من حرّها تحرق شيطان
لعنتي ما يردها عسكر وجان
باختصار والله عليكو المستعان
هبقا نار يومها واضرب في المليان