شيكا عالعالي( القمة العربية)---

شيكا عالعالي ........ شيكا عالواطي
ليه الشعب العربي مطاطي ؟
ليه كلمتنا مش مسموعه !
ليه لقمتنا مش مبلوعه !

لاجل سُؤالنا هنعمل قمــة
و اللي يعدي يروح عالإمّه
لاجل القمه هنسأل تاني

واللي سَامعنا يقول للتاني
شيكا عالعالي ........ شيكا عالواطي
ليه الشعب العربي مطاطي؟
رد معاطي الديموقراطي
يمكن دِسك من الأرضية
يبقى علاجة شوية مَيّة

ويريح حبة الصُبحية
ولا نجيب له سلاح مطاطي ...
نضرب فالعالي وف الواطي..
شيكا عالعالي ....... شيكا عالواطي
ليه الشعب العربي مطاطي ؟
قال العم كبير العيلة

صاحب القعدة وصاحب الليلة
يمكن قَفشه من الحلزونة
اللي جريرها وهاتك لف

ولا تكونش الحلوه معونة
اللي شايلها ووّاخد كف
قام الزول بسلامتة يقول
يمكن دَعوه علية جايه له
عايزه تخلي جنوبة شماله

لف الدور على عم زناتي
شايل كيلو ونص زبادي
داهن وشه وسايب عشه
قاعد ويّا عدوه ليلاتي
واكل أكله وفاكر شكله
جاب له كباب من عند الحاتي
سأله الكُل سؤالنا الأتي
شيكا عالعالي ..... شيكا عالواطي
ليه الشعب العربي مطاطي ؟
رد بسرعه العم زناتي
يمكن وعكه من الأسياد
يبقى يلف سبع لفات
قال العم أبو عِمه وشال
صاحب العِزه وصاحب المال
يمكن طَاطَا من البَرّيمْه
وإحنا عشان نيتنا سليمه
يبقى عرفنا سؤالنا الماضي
شيكا عالعالي ........ شيكا عالواطي
ليه الشعب العربي مطاطي ؟

تصفيق حاد ف القاعه ياهووه
حتي الأعمى كمان صَحووه
وأنتهت القمة العربية
وهنعمل حفلة الصبحية
لاجل ميعاد القمة الجاية

ويكون برضة سؤال القمة
يلا عشان هنشد الهمه
شيكا عالعالي ........ شيكا عالواطي
ليه الشعب العربي مطاطي ؟
----------------------------
علاء ابوذكري

أشكرك وسعيد جدا بإنضمامي اليكم